Tag 9 Gruppitag

Hüt am Morge hämmer am George, üsem Dschungel-Guy, e chliini Überraschig vorbereitet: i verschidene Gruppe hämmer chliini Tänz iistudiert, passend zu sine liebschte Wildtier. Die «Tänze der wilden Tiere» hämmer ihm denn als Überraschig vortreit und er hät sich meega gfreut.

De Numitag hämmer i üsne Gruppi-Gruppe verbracht und eifach mal chli chönne gnüsse mit üsne Gspänli und Gruppeleiter: vo Wasserrutschi, über en Stadt- oder Kinobsuech bis zu Tshirt färbe, Pizza bache und Escape Room isch alles debi gsii 🙂

Am Obig häts nacheme feine Burger zum Znacht no en Casinoobig deluxe geeh. Bi verschidenste Spiel hät mer chönne sis Gäld vervielfache oder halt au verspiele. Zudem häts im Casino au paar Attraktione geeh, womer sich hät chönne vergnüege, wie zum Biispiel d Hellseher oder d Sirupbar.