D JUMO Kaltbrunn isch 1989 gründet worde us de Jungwacht und de MOK (Mädchenorganisation Kaltbrunn). Sit denn ghöred mir zum Verband Jungwacht Blauring Schweiz (Jubla).
Eis bis zweimal treffed mir üs i gliichaltrige Gruppe und unternehmed Sache wie Bastle, Spiele, d Natur entdecke und verbringed ide Gruppe e gueti Ziit. Mehrmals im Jahr hemmer au Aaläss mit de ganze Schar (Scharanlässe), zum Bispiel d Fasnacht, de zweitägig Maischaraalass oder s Silvesterlüte.
Eine vude Höhepünkt vum JUMO-Jahr isch sicher s Summerlager (J&S-zertifiziert). Die grade Jahr gömmer ines Zeltlager und ide ungrade ines Huuslager. S Lager isch immer ide erste zwei Summerferiewuche.
Momentan simmer um die 100 Persone ide JUMO, mir freued üs immer über neui Gsichter und wend möglichst vielne Chind unvergässlichi Erlebnis büte. Meh Infos finded Ihr uf üsere Website oder grad direkt bide Scharleitig (scharleitung@jumo-kaltbrunn.ch).
