Tag 1 anreise

Negativ isch s neue Positiv!! Nachdem mir alli negativ uf Corona testet worde sind, hend sich d Penelope und de René vorgstellt und üsi Weltreis igleitet. Au ide Kirche hemmer scho z’erste Mal e chlini Weltreis gmacht und d’Gschichte vu de verschiedene Heilige entdeckt. Bevor mer denn hend derfe in Car istige, sind alli Rücksäckli und Persone uf verbotnigi Gegeständ kontrolliert worde. Zum Glück isch nur ein Gegestand ufgfalle: Es Nastuechpack – isch aber nur en Fehlalarm gsi 😉 Obwohl es paar Eltere au fast hend welle mitreise, hemmer eus denn vu allne verabschided und mitem Car eusi Weltreis gstartet. Nacheme lange Stuck im Stau hemmer denn endlich am 14.00 Uhr chöne eusi Mäge fülle und de ersti TW dureführe. Nur no 1 Stund fahre und mer sind scho in Schwarzsee acho und hend üsi Zimmerli chöne bezieh. Am Abig, gstärkt mit superfeine Älplermaggarone, sind denn d Lagerregle erklärt worde und s’het z’allerletzt e chlini Jassrundi geh bevor mir üs denn alli todmüed is Bettli grüert hend.