tag 10 Italien

Mit em Flugzüüg simmer hüt in Italie glandet. Mir hends gad rechtzitig zu de Fuessball-EM gschafft. D Chind hend sich i Buebe- und Meitlimanschafte ufteilt und ahschlüssend spannendi Match gegenenand gspillt. D Sieger bi de Fraue isch d Mannschaft vo Rom gsi, während sich bi de Manne d Mannschaft vo Napoli het chöne bewiise. Zum Zmittag hets traditionell italienisch Spaghetti geh. Am Nammitag hend d Chind verschiedeni italienischi Spieli ihrer Wahl gspillt. Boccia, Spaghetti zie (Seil zie), Gladiatorekampf (Schwinge) und no villi wiiteri Spili sind zur Wahl gstande. Über Videokonferenz hemmer sogar no mitem Papst dörfe schwätze. Zum Znacht hemmer e feini Lasagne derfe gnüsse. Für euse allbekannte Pärliabig hend sich alli picobello useputzt. Die verschiedene Päärli hend sich verschiedene Ufgabe müsse stelle. Als Mister und Misses SOLA 2021 sind de Robin und d Mara kürt worde. Dadruf hi hets gheisse: «Buonanotte a tutti» und mir sind zrug is Flugzüüg gstiege und hend üs uf de Weg zum nächste Land gmacht.